டித்வா அனர்த்தத்தால் சேதமடைந்த பதுளை ஓயா நீர்ப்பாசனத் திட்டத்தின் நிரந்தரப் புனரமைப்புப் பணிகள் இறுதிக்கட்டத்தை எட்டியுள்ளன. எதிர்வரும் பெரும்போகப் பயிர்ச்செய்கையை முன்னிட்டு, அடுத்த சில நாட்களில் நீரை விநியோகிக்க நடவடிக்கை எடுக்கப்பட்டுள்ளதாகத் தெரிவிக்கப்பட்டுள்ளது.
1944 ஆம் ஆண்டு ஆரம்பிக்கப்பட்ட இந்த நீர்ப்பாசனத் திட்டத்தில், இதுவரை முன்னெடுக்கப்பட்ட மிகப்பெரிய அபிவிருத்திப் பணியாக இந்தப் புனரமைப்பு அமைந்துள்ளது.
இதற்காக அரசாங்கம் ரூ. 350 மில்லியன் செலவிட்டுள்ளது.
கடந்த ஜூன் 05 ஆம் திகதி நிரந்தரப் புனரமைப்புப் பணிகள் ஆரம்பிக்கப்பட்டன.
அனர்த்தத்திற்குப் பின்னர் விவசாயிகள் எதிர்கொண்ட நீர்ப்பற்றாக்குறைக்குத் தற்காலிகத் தீர்வாக, கடந்த ஜனவரி மாதம் மணல் மூட்டைகளைப் பயன்படுத்தி நீர் விநியோகம் மேற்கொள்ளப்பட்டது.
தொடர்ந்து முன்னெடுக்கப்பட்ட நிரந்தரப் புனரமைப்பின் கீழ், பிரதான கால்வாயின் இரண்டு கிலோமீற்றர் நீளப்பகுதிக்கும் கொங்கிறீட் அடுக்குகள் அமைக்கப்பட்டு முழுமையாகச் சீரமைக்கப்பட்டுள்ளன.
நீர்ப்பாசனத் திணைக்களத்தின் குறைந்தளவிலான பணியாளர்கள் மற்றும் பொறியியலாளர்கள் உள்ளிட்ட குழுவினர், விடுமுறையின்றி இரவு பகலாகப் பணியாற்றி, சுமார் நான்கு மாதங்களுக்குள் இந்தப் பணிகளை நிறைவு செய்துள்ளனர்.
இந்த நீர்ப்பாசனத் திட்டத்தின் மூலம் 1,775 ஏக்கருக்கும் அதிகமான விவசாய நிலங்களுக்குத் தண்ணீர் வழங்கப்படுகிறது. புனரமைப்புப் பணிகள் நிறைவடைந்ததும், இதற்கு முன்னர் நிலவிய நீர்ப்பற்றாக்குறைக்கு நிரந்தரத் தீர்வு கிடைக்கும் என எதிர்பார்க்கப்படுகிறது.
மேலும், முன்பிருந்த கொள்ளளவை விட ஏறத்தாழ இரு மடங்கு நீரை எடுத்துச் செல்லும் திறன் கிடைப்பதால், யல மற்றும் மகா பருவங்களுக்கு மேலதிகமாக இடைப்பருவத்திலும் விவசாயம் மேற்கொள்ளும் வாய்ப்பு உருவாகும் எனத் தெரிவிக்கப்பட்டுள்ளது.
இதன் மூலம் கந்தகெட்டிய பகுதி விவசாயக் குடும்பங்களின் பொருளாதாரமும் வாழ்வாதாரமும் வலுப்பெறும் என எதிர்பார்க்கப்படுகிறது.
குறித்த புனரமைப்புப் பணிகளை பார்வையிடுவதற்காக இளைஞர் விவகார பிரதி அமைச்சர் தினிந்து சமன் ஹென்னாயக்கவுடன் கந்தகெட்டிய பிரதேச சபைத் தலைவர் ஹர்ஷ ரத்நாயக்க, கந்தகெட்டிய பிரதேச நீர்ப்பாசனப் பொறியியலாளர் இசுரி நதீஷா சதுராணி உள்ளிட்ட அதிகாரிகளும் அண்மையில் கள விஜயம் மேற்கொண்டிருந்தனர்.
இச் செய்தியினை ஏனையவர்களுக்கும் பகிர….👇👇
